Restricted tender ZPM sorkarin an duhsak zawng an pe hnem hle- MNF GS

by News Editor

Tualchhung News

ZORAM TODAY| 6th February, 2026: Vawiin khan MNF party chuan Mizo Hnam Run ah chhung inkhawm an nei a, thusawitu MNF General Secretary J. Malsawmzuala Vanchhawng chuan, restricted tender chungchangah ZPM-in sorkar hmasa nasa taka demin a sawichhia a. An tehfung ang chiaha teh chuan PWD (Highway) hnuaiah 2018-2023 Nov. thlengin restricted tender pek a awmlo. ZPM kum hnih sorkar chhungah 155 Cr. (Rs 1,55,39,49,734) hu man an duhsak zawngte restricted tender pek a ni tawh, a ti.

J. Malsawmzuala chuan, PWD (Building) hnuaiah MNF kum 5 sorkar chhungin restricted tender 95, Rs. 53312.46 lakhs hu pek a ni. ZPM sorkar kum 2 chhungin hna 96, Rs. 55196.56 lakhs hu pek a ni thung, a ti a.

“Heng bakah hian department dangah tam tak sawi tur a awm. Tunhmaa kan la hriat ngailoh, restricted tender pek huk phalna, 'Blanket Approval,' hial pek a ni bawk” a ti a.

MNF General Secretary chuan, ZPM te’n an opposition laiin MNF sorkarin restricted tender an tih ṭhin sawisel in thiam taka Minister/ MLA te eirukna a ni, tiin mipui an fah a, sorkar lai an bei a, ZPM in sorkar an siam hnu, an term chanve chhung ringawt pawhin MNF sorkar tih an khum nasa hle tawh niin a sawi.